ఆంధ్రప్రదేశ్‌లోని తీర ప్రాంతాల్లో ఇతర రాష్ట్రాల జాలర్ల అక్రమ ప్రవేశంపై రాష్ట్ర ప్రభుత్వం కఠిన వైఖరి తీసుకుంది. ముఖ్యమంత్రి నారా చంద్రబాబు నాయుడు నెల్లూరు, తిరుపతి జిల్లాల అధికారులకు స్పష్టమైన ఆదేశాలు జారీ చేశారు.
ఆంధ్రప్రదేశ్ తీర జలాల్లోకి తమిళనాడు జాలర్లు తరచూ ప్రవేశిస్తూ స్థానిక మత్స్య సంపదకు నష్టం కలిగిస్తున్నారనే అంశంపై వివాదం తీవ్రంగా మారింది. ప్రజల ఆందోళనలను దృష్టిలో ఉంచుకుని సీఎం కఠిన చర్యలు తీసుకోవాలని అధికారులను ఆదేశించారు. ఏ పరిస్థితుల్లోనూ ఇతర రాష్ట్రాల జాలర్ల చొరబాటును సహించబోమని ఆయన స్పష్టం చేశారు.
ఆంధ్రప్రదేశ్ మత్స్యకారులు తమిళనాడు జలాల్లోకి వెళ్లరని, అలాగే తమిళనాడు జాలర్లు కూడా ఏపీ సముద్ర జలాల్లోకి వచ్చి ఉద్రిక్తతలు సృష్టించడం సరైంది కాదని సీఎం పేర్కొన్నారు. నిబంధనలు అతిక్రమిస్తే కఠిన చర్యలు తీసుకుంటామని హెచ్చరించారు. ఈ విషయంలో ఎలాంటి ఒత్తిళ్లను పట్టించుకోకుండా చర్యలు తీసుకోవాలని నెల్లూరు మరియు తిరుపతి జిల్లా కలెక్టర్లకు సూచించారు.
స్థానిక మత్స్యకారులు తమ జీవనోపాధిపై తీవ్ర ప్రభావం పడుతోందని ఆందోళన వ్యక్తం చేస్తున్నారు. దీంతో రాష్ట్ర ప్రభుత్వం తీర భద్రతను బలోపేతం చేయాలని నిర్ణయించింది. అక్రమ చొరబాట్లను అరికట్టేందుకు హైస్పీడ్ పెట్రోలింగ్ పడవలను వినియోగించాలని సీఎం ఆదేశించారు.
ఈ సమస్యపై తమిళనాడు ప్రభుత్వం మరియు భారత ప్రభుత్వం కు కూడా ముఖ్యమంత్రి లేఖలు రాశారు. సరిహద్దు నిబంధనలపై జాలర్లకు అవగాహన కల్పించి, ఇలాంటి ఘటనలు పునరావృతం కాకుండా చర్యలు తీసుకోవాలని విజ్ఞప్తి చేశారు. తీర ప్రాంతంలోని 162 గ్రామాల ప్రజలు ఈ సమస్య వల్ల ఆందోళన చెందుతున్నారని కూడా ఆయన వివరించారు.